رسالة طمأنة من الرئيس السيسي للشعب: «مفيش حد يقدر يعمل حاجة مع مصر»
وجه الريس عبدالفتاح السيسي، رسالة طمئنة للشعب المصري سواء داخل مصر أو خارجها، قائلًا: «بطمئن الشعب المصري على الأوضاع سواء في الداخل أو الخارج».
وأوضح الرئيس السيسي خلال الكلمة التي ألقاها في حفل تخرج دفعة جديدة من أكاديمية الشرطة، اليوم الأربعاء: «هذا أمر أنا حريص على التحدث عنه في مرحلة صعبة تمر بها منطقتنا منذ سنوات، وظروف قاسية جدًا تمر لها تأثير كبير على استقرار وأمن دول كثير جدًا تُحيط بنا»، مُضيفًا: «ولكن بفضل الله سبحانه وتعالى، بالله قبل كل شيء وبالمصريين، مش بتكلم على مؤسسات دولة بعينها أنا بتكلم عن الشعب المصري بالكامل، أحنا الحمد لله رب العالمين تقريبًا من 2013 وحتى الآن مرت ظروف صعبة كثيرة وواجهنا إرهاب قاسي، ولكن بفضل الله وبفضل أبناء مصر تم التغلب عليه».
وتابع الرئيس السيسي خلال كلمته: «أقدر أقول من 2022 حتى الآن الأمور تسير بشكل طيب بفضل الله سبحانه وتعالى وبفضل أبناء مصر سواء كان الشعب أو مؤسسات الدولة الجيش والشرطة وباقي الأجهزة الأمنية المعنية بهذا الأمر، أنا بأكد الكلام دة، علشان أي تحدي وتهديد ماتقلقوش منه طول ما الشعب المصري كله مع بعض، أي تحدي بفضل الله نقدر نتجاوزه وأي خطر نستطيع التصدي له، يمكن الكلمة دي أنا بكررها كتير لأن مفيش حد يقدر يعمل حاجة مع مصر خالص».
وذكر الرئيس السيسي: «أحنا عمرنا ما كنا بنتكلم بشكل فيه غلو أو تعالي أو تفاخر، بنتكلم متواضعين جدًا لله سبحانه وتعالى ولبلدنا، ماحدش بفضل الله سبحانه وتعالى يقدر، بس أنتوا يا مصريين افضلوا دائمًا كدة دلوقتي وبكرة وكل السنين اللي جاية، وبقولكم أي تحدي يقابلنا داخليًا في الاقتصاد، في الأسعار أو أي حاجة تانية، نستطيع أن نتجاوزه ونتغلب عليه ونعبره بفضل الله سبحانه وتعالى وبفضل وحدتكم وتمسككم وصلابتكم وتحملكم وصبركم، هي الحكاية كدة وشوفوا اللي بيحصل في كل حتة في الدنيا مش بس في منطقتنا وأنتوا تعرفوا أن أي دولة في الدنيا بصلابة شعبها تقدر أن تعبر كل الأزمات والتحديات اللي بتقابلها».
الحياة نيوز موقع إخباري شامل يهتم بتغطية كافة الأحداث على المستوى الدولي والمحلي ورصد أهم الأخبار والاقتصاد أسعار الذهب ،البورصة المصرية ،أخبار الرياضة ،محافظات ، حوادث ، أخبار التعليم .
